 |
| kedah hormat ka habib sareng ulama |
Urang kedah hormat ka Habib, utamana nya Habib nya Ulama, margi Habaib tèh ngarupikeun "Alhi Bait" sakaligus zurriyah Rosul Saw.
Dawuhan Allah QS. Alahzab : 33
انمايريد الله ليذهب عنكم الرجس أهل البيت ويطهّركم تطهيرا
Pangna Allah ngamaksad ngilangkeun kokotor (dosa) ti aranjeun, hè "Ahli Bait", jeung meresihan aranjeun saberesih-beresihna.
Dawuhan Kang Rosul Saw. riwayat Tabrani sareng Nasa-i.
إنّي تارك فيكم ما ان تمسكتم لن تضلوا : كتاب الله وعترتي أهل بيتي
Kuala ninggalkeun perkara nu aya di arahanjeung, lamun aranjeun nyekel pageuh kana eta titinggal, aranjeun moal sasar salilana, nyaèta Kitabulloh jeung turunan ahli bait Kaula, Dumasar ayat sareng hadis ieu, kacida mulyana "Ahli Bait", sanaos para ulama benten paham dina ngamaknaan istilah "Ahli Bait"
Sapamendak sim kuring aya tilu pamahaman.
Hiji : "Ahli Bait" tèh nyaèta lungsuran Fatimah binti Muhammad sareng Sayyidina Ali. Maka lungsuran Hasan sareng Husein kalebet Ahli Bait, putrana Sayidina Ali ti istri salian ti Fatimah teu kalebet ahli bait. (Kifayat Atqiya, hlm. 5).
Kabeh dieunakeun lungsuran Hasan disebat "Syarif", lungsuran Husèin disebat "Sayyid". Saterasna ti golongan "Sayyid" aya nu disebat "Habib" lisensina dikaluarkeun ku "Rabithah Aliwiyah" di Jakarta. Janten nu disebat "Habib" mah kedah aya lisensina.
Tah ieu paham mayoritas ulama.
Dua : Numutkeun Imam Syafii, "Ahli Bait" tèn sanès lungsuran Fatimah-Ali wungkul, tapi gelar "Ahli Bait" mah ka sadaya lungsuran "Abu Mutalib" (Èyang Kangjeng Nabi) sareng lungsuran "Hasyim" (Uyut Kangjeng Nabi), kitu katerangan Imam Nawawi dina kitab ( Syarh Bahjat al-Wasâil, hlm. 3).Kukituna Sayyidina Abbas sareng Sayyidina Hamzah kalebet ahli bait. Tilu : Numutkeun Imam Nawawi (Ibn Qasim Gazi, Fath al-Qarib, hlm. 1), yèn ahli bait tèh sadaya umat Islam.
Najan paham ulama rupi-rupi, tapi paham anu diyakini ku mayoritas muslim paham anu kahiji, nyaèta paham yèn ahli bait tèh lungsuran Fatimah sareng Ali, matak ka habaib, komo ka habaib sakaligus ulama mah urang tèh kedah ngahormat.
Urang kedah ngahormat sareng ngamulyakeun Habaib, najan urang benten pemahaman, da benten paham mah biasa antara manusa sok aya waè, ngan sanajan urang benten pemahaman sareng Habib, ulah dimaknaan urang teu kedah ngahormat Habib.
Teu aya lepatna upami urang benten paham sareng Habib, nu lepat mah urang teu hormat ka Habib lantaran benten pemahaman.
Sapertos urang sareng Imam Hanafi, paham urang seueur perbentanan sareng Anjeuna, tapi sanaos banten paham, urang tetep kedah ngahormat sareng ngamulyakeun Imam Hanafi.
Atanapi sapertos sikap urang ka Almarhum Buya Hamka, dina buktosna Sim Kuring anggota NU, pasti seueur perbentenan paham sareng Buya Hamka, margi Hamka mah anggota Muhammadiyah, tapi sanaos kitu, urang kedah ngahormat, ngamulyakeun sareng ngadu'akeun Hamka.
Sakitu èmutan sim kuring dina ngeunaan benten pemahaman sareng Habib atanapi sareng Ulama.
Mugi manfaat
H. A. Rifqi Fuad ( Pomdok Pesantren Al- Islamiyah)
